自由

一、受訪者基本資料

    名姓：鄭清佑

    佮我ê關係：阿公佮孫仔

    佗位人：雲林縣元長人

    蹛過啥物所在：雲林縣元長鄉埔墘(無離開過)

    讀過啥物學校：補習班(國小無畢業)

    食過啥物頭路：貨車車手、賣厝仲介

二、受訪者ê人生中，較大項ê代誌抑是受訪者感覺較值得講ê代誌。

    民國31年(1942年)出世

    民國34年(1945年)光復：傷細漢無印象。

    民國38年(1949年)二二八事件：傷細漢無印象。

  民國38～76年(1949年至1987年)白色恐怖：因為蹛佇庄跤所以白色恐怖無影響著。只是有印象彼當時的序大攏交代講，毋管聽著啥物抑是看著 啥物攏袂使黑白講，囡仔人有耳無喙。

  民國68～79年（1979年至1980年）美麗島事件：發生的地點是佇高雄，加上彼當時的消息無流通，所以阿公知影這項代誌已經是發生足久以後。阿公表示對美麗島事件無啥物感覺。

  民國76年(1987年)解嚴：其實解嚴佮蹛佇庄跤的人來講無啥影響，毋過有感覺彼進前更加自由。

三、受訪者對台灣近現代ê較大ê事件，是毋是有親身參與抑是身邊發生ê。

    阿公講近代發生的代誌較有印象的有「第一擺投票」、「九二一地動」閣有「政黨輪替」。

    阿公第一擺投票是投予李登輝前總統，阿公是一个足支持國民黨的人。阿公閣有講著彼當時本來民進黨的總統候選人其實是真有可能當選的，毋過因為中國大陸進行飛彈演習，逐家人開始驚惶，所以有真濟人放棄投票予彭明敏先生改選李登輝前總統。這段過程我本來毋知，原來台灣的第一任民選總統就是按呢選出來的！

九二一地動的時陣因為庄內無發生啥物代誌，加上親情朋友無人佇這个

地動出狀況，所以九二一的恐怖佮台灣其他所在的慘況是對電視新聞內知影的。但是阿公有講著，彼當時規台灣的氣氛真正是足悲傷的。電視新聞逐工攏會播出災情的狀況，逐工攏有真濟人死亡的消息。所以，阿公的印象嘛特別清楚。

    講著政黨輪替，阿公有真濟憤慨。因為伊認為李登輝前總統做了真好。雖然第二擺的總統選舉李登輝前總統無參加選舉，但是阿公嘛是認為身為前一任副總統的連戰先生會比民進黨的總統候選人更加會曉管理台灣。所以，阿公認為應該愛予連戰先生當選總統才著。

四、訪談後我ê心得

    阿公是一个真好運的人，台灣發生的悲慘事件攏無影響的阿公的人生。毋過按呢嘛予我知影，原來白色恐怖彼當時毋是每一个台灣人攏是生活佇驚惶之下。阿公的經歷雖然無啥物驚天動地的代誌，但是我認為按呢嘛是一種幸福。毋免為著家己抑是親情朋友的性命操煩，平平安安、無災無難的過一生。

    訪問結束了後我閣有問我的阿爸佮阿母in的看法。阿母講，外公彼爿一个足大的家族。逐家人攏有袂使惹代誌，安安份份過生活的心理。所以當然對遮的政治事件袂上心，嘛袂去理睬。同時，嘛因為是蹛佇離政治中心較遠的庄跤，所以真濟代誌是無影響、甚至是完全毋知的。阿爸彼爿是因為生活已經是足艱苦的，所以當然無心情、嘛無功夫去參與政治事件。

    其實，對阿公所以講的內容內底會使看出，早期的台灣政府並無予遐的算是「叛亂」的消息散佈。所以，除非是有參與的人抑是in的家屬才會知影這寡代誌的發生以及政府的無理佮殘忍。真濟事件是近代才予人民知影的，若是政府毋開放言論自由，咱可能這馬閣毋知原來有遮爾濟人為著台灣人的權利咧打拚。

     我真佩服遮的為著台灣未來咧打拚的前輩，真濟人的名字我記袂起來，但是in的辛苦咱是有看著的、是有價值的！前輩用in的性命去完成in認為

是著的代誌，堅持in的理念、無願意向強勢無理的政府屈服。咱真正愛好好感謝一寡前輩，若是無in就無這馬的民主自由！

    前輩in的堅持予我真大的啟示！毋管未來是按怎的黑暗、不確定，咱家己的命運是掌握佇咱自己的手內。雖然我無法度像前輩in仝款為著全台灣人打拚，但是我希望我家己嘛會使出一份力，做一个對台灣社會有奉獻、有價值的人！