自由

一、詩的紹介

詩名：鐘聲響起時－給受難的山地雛妓姊妹們

作者：莫那能

書名：美麗的稻穗

出版社：晨星出版社

二、詩的分析

    <鐘聲響起時>是一首描述原住民雛妓心情的詩，詩的內容反映出原住民少女佇威權統治之下的無助佮悲哀。其實，莫那能之所以會寫出一首詩主要有兩个原因。第一，是因為莫那能的小妹嘛遭遇過相仝的命運。第二，是因為莫那能看見真濟原住民少女因為予人控制就按呢淪落的事件。莫那能為伊的小妹以及遮的少女打抱不平，所以寫出一首詩，希望會使予更加濟的人正視這个問題。

    一開始看著<當鐘聲響起時>這个詩名時，會予人以為這篇詩文是一篇平靜美好的抒情詩。毋過，當讀者看著詩句的時陣，馬上就會了解家己的想法完全毋對。詩的文字並無使用強烈的語詞，只是用平淡的口氣講出原住民少女的哀怨佮無助。歸篇詩內底嘛無任何的怨恨，有的只是用一句句的祈問句講出原住民少女希望會使重回平靜生活的簡單向望。雖然作者佇詩文之中並無講出任何的控訴，但是只要你讀過一遍，你就會使完全體會著作者對這个問題的強烈批判。原住民一直是社會的上尾一層，in的聲音總是予人放袂記。作者希望社會大眾開始注意著這个問題，嘛祈求這个問題會使趕緊解決。

    這首詩總共有五葩，每一葩攏存在著強烈的對比。歸首詩的主要意象是「鐘聲」，詩文內底總共出現七擺的「鐘聲」，每一擺的「鐘聲」攏代表無仝的意義。首先是第一葩，「當老鴇打開營業燈吆喝的時候」直接點破作者欲講的主題就是佮趁食查某相關的。然後的「教堂響起的鐘聲／又在禮拜天早上響起／純潔的陽光從北拉拉到南大武／灑滿了整個阿魯威的部落」毋若說明趁食查某的身分是原住民，同時嘛佮第一句做出強烈對比。第二葩的形式佮第一葩相仝，「當客人發出滿足的呻吟後」表明詩文的描述對象是趁食查某。毋過，接續的「學校的鐘聲／又在全班一聲『謝謝老師』後響起／操場上的鞦韆和蹺蹺板／馬上被我們的笑聲佔滿」有了無仝的意義。仝款攏是結束，毋過佇學校時的「謝謝老師」佮現下時的「滿足客人」出現強烈的對比佮諷刺。按呢的反差予原住民少女已經無法度忍受落去，in想起、嘛盼望起以前的平淡日子。佇第三葩內底會當清楚感受著少女的無奈。「當教堂的鐘聲響起時/當學校的鐘聲響起時」，少女只會當佇家己的心內喝著：「媽媽，你知道嗎？／荷爾蒙的針頭提早結束了女兒的童年」以及「爸爸，你知道嗎？／保鏢的拳頭已經關閉了女兒的笑聲」。雖然毋願，但是事實就是按呢。少女連反抗嘛無想欲反抗，只是恬恬的佇心內流目屎。第四葩是歸首詩的轉換點，描述少女心情的文字有了轉變。「再敲一次鐘吧，牧師/用您的禱告贖回失去童貞的靈魂/再敲一次鐘吧，老師/將笑聲釋放到自由的操場」。少女青春早就已經無去，珍貴的童貞是欲按怎「贖回」，已經消失的笑聲欲按怎閣再轉去以前？就算是祈求「牧師」佮「老師」，一切猶原是無可能達成的願望。上後尾一葩，少女希望重生，希望將進前的一切攏放袂記。「當鐘聲再度響起時」，少女祈求自己已經是一个完全自由、無任何約束的平凡原住民女子。毋過，少女的「爸爸、媽媽，你們知道嗎？/請你們把我再重生一次」咱攏知影家是永遠的避風港，如今無辜的少女顛倒予這个避風港背叛、傷害，遮是偌呢諷刺的一件代誌。少女閣天真的希望父母可以聽見自己，但是這个呼喚，in的爸母是聽袂著的......

    一篇好的詩作就是會使予讀者體會著詩文所欲表達的情感，嘛因為這首詩是作者莫那能家己的親身感受，所以文字之中的情緒更加會使引起讀者的共鳴！