自由

一、冊ê基本資料：

   冊名－台灣處分1945年

   作者－鈴木茂夫

   譯者－陳千武

   出版社－晨星

二、內容介紹：

故事開始的時間點是1944年，嘛就是日本投降的前一年。這時的日本已經是戰敗連連，軍力嘛無法度閣支持落去。毋過，台灣的人民抑是予日本政府騙甲毋知人去，閣認為日本的戰況是贏面的。一直到台灣陸軍抓著一个美國轟炸機的士兵，這个事實的龜跤才趖出來。之後，日本政府為著欲彌補這个錯誤，想出了用人駕駛轟炸機直接衝入去美軍基地的方法。執行這个方法的軍隊，就是咱所講的「神風特攻隊」。

    戰爭後期，雖然戰爭火無直接侵襲台灣本島。但是，台灣人民戰死的數目嘛已經濟到無法度算予清楚。因為美國佇日本本島的廣島佮長崎投下原子彈，所以日本在1944年8月15日宣布無條件投降，第二次世界大戰正式宣布結束。台灣的軍人、人民閣有佇台灣的日本人總算會當放下驚惶的心情。

    戰爭結束了後，國民政府的軍隊進入台灣。台灣人民用迎接祖國的期待心情準備迎接國民政府的軍隊。台灣人民攏以為會看到聲勢壯大的軍隊入港，毋過卻是看到悽慘落魄的軍隊，這予台灣人民真大的衝擊。但是，透過日本人的眼光顛倒是講，遮的軍人才是經過苦戰的正當軍人。

三、心得：

這本冊予我對台灣佇第二次世界大戰的處境，有閣卡濟的了解。冊內底是用日本人的觀點描寫台灣對第二次大戰後期到戰後的情形。讀了這本冊，予我了解足濟我所毋知的代誌，其中包括美國軍人被槍殺的真相、台灣島的人是按怎予日本政府欺騙等等的真相。遮的事實的真相予人感覺真稀微，嘛足無奈的。一个大帝國主義的國家，竟然落魄到愛用欺騙的方法來隱瞞家己國家的軍人佮人民，這嘛予人真感嘆。

戰爭之下一定有犧牲，但是嘛袂使按呢輕視人命。日本政府為著欲改變予敵軍打壓的困境，提出利用士兵駕駛掛著足濟炸彈的戰鬥機直接衝入去敵方的基地的方法，打擊美軍的勢力。這就是咱所講的「神風特攻計畫」，執行這个任務的軍隊就是「神風特攻隊」。我進前捌佇電視上看過「神風特攻隊」執行任務時的影片，看著戰鬥機直接挵入去美軍的軍艦，這个畫面予我真大的衝擊。那會使凊凊彩彩就予人民去送死，一條寶貴的性命就按呢消逝。雖然歷史上記載台灣人戰死的數目有三萬三百零四人，但是實際上戰死著沙場的人是不只按呢的。

戰後，台灣總算會當回歸中國的懷抱。但是予日本統治五十年了後，台灣人嘛已經無算是真正的中國人。日本將台灣人當做外人，所以對待台灣人的態度就親像對待被殖民者仝款。真毋簡單總算等到會當回歸祖國，但是等著的卻是比日本人更加無理的對待佮統治，台灣人的命運真正是坎坎坷坷！

四、參考資料：

1、《台灣處分1945年》

2、博客來書籍館  http://www.books.com.tw/exep/prod/booksfile.php?item=0010221280

3、東京療望台   http://blog.libertytimes.com.tw/dylantaga/2007/03/30/581