自由

    這个禮拜有足濟的送舊活動！毋管是系上的、系上排球隊的抑是社團的，攏予我感覺真毋甘。想著四年仔的學長佮學姊就欲離開一个大家庭，就會足傷心的！對一年仔到三年仔的人攏真用心咧準備送舊活動，就是想欲予學長、學姊有一个完美的回憶！雖然準備的過程真辛苦，練習之中嘛拄著真濟困難，毋過看著學長佮學姊看阮準備的表演看甲真歡喜的時陣，就感覺所有的付出攏有價值囉！真心希望畢業的學長、學姊攏會使有真好的未來，就算是遭遇難題，嘛會使順利化解。

    等待的心情真正是予人足緊張的！經過足長時間得等待，這禮拜一總算公布有通過師資生資格的名單，足歡喜我的名字有出現佇名單頂面。另外一方面，我所申請的「知能增能學程」嘛佇今仔日公布名單。真歡喜我嘛有通過資格！

    毋過，嘛因為按呢出現了予我煩惱的代誌。我應該愛按怎分配我二年仔的課程才好？這个問題真正無好處理......

    最後，我決定將「師資生」囥佇第一，我的興趣「知能增能學程」就先將伊擺佇第二。希望我未來會當有時間來好好上佮我的興趣有關的「知能增能學程」。

    最近真正足無閒，所有的活動攏佇這个時陣舉辦。毋管是系上送舊活動的表演，抑是社團的成果發表會，攏需要時間好好練習。這馬逐工攏愛練習送舊活動的表演，有時陣的暗時閣愛去社團練習欲表演的物件。希望按呢用心的練習會當予表演順利進行，嘛希望會使予四年仔的學長佮學姊看了真歡喜！

    社團的成果發表會就欲佇後禮拜三舉行，我真正足緊張的！這擺發表會所欲演出的樂曲，閣有一寡仔是我無蓋熟的，我愛利用有閒的時間好好練習練習。希望佇發表會的時，會使演出完美、無錯誤的樂曲！

   這馬甲知影「跳舞」這項代誌真正有夠辛苦！因為系上欲舉辦送舊的活動，所以阮班準備了一个跳舞的節目欲予四年仔的學長佮學姊欣賞。大家攏為著這个表演真用心咧練習！雖然動作真困難，這馬的大家攏無法度做了真好看......但是我相信只要大家一直練習落去，一定會使表演出上精彩的節目！看著大家遮爾打拚，我嘛欲提出我上頂真的心態，將這个表演做甲上好！

    英文的話劇比賽是這禮拜上精彩的代誌。雖然我無演出任何角色，但是身為班上的一份子，我嘛是緊張甲一粒心臟跳袂煞。毋過真可惜，阮班的表演無得著評審的欣賞。但是，經過這擺的比賽，大家的感情更加好，嘛熟似更加濟的人！

    這禮拜我總算將一本看了足久的冊看完，這本冊的冊名是一九四五年台灣處分。這本冊予我對台灣佇第二次世界大戰的處境，有閣卡濟的了解。冊內底是用日本人的觀點描寫台灣對第二次大戰後期到戰後的情形。讀了這本冊，予我了解足濟我所毋知的代誌，其中包括美國軍人被槍殺的真相、台灣島的人是按怎予日本政府欺騙等等的真相。遮的事實的真相予人感覺真稀微，嘛足無奈的。一个大帝國主義的國家，竟然落魄到愛用欺騙的方法來隱瞞家己國家的軍人佮人民，這嘛予人真感嘆！

    這禮拜是予我上緊張的一个禮拜，這是為啥物咧?因為這禮拜會分期中考所考的考卷。看著同學一个一个行進前去領考卷，我的心臟是咧欲跳出來。雖然這擺考試的成績無我原本想的遐爾悽慘，但是嘛無講蓋理想。所以，我決定欲更加用功讀冊。我欲佇期尾考的時陣，好好表現予對我有所期待的老師看！

    這禮拜閣有一項代誌予我真煩惱，遐就是揣厝。因為無抽著學校的宿舍，所以我愛去揣新學期欲住的所在。毋管是對網路上揣、問學長佮學姊抑是去街路黑白揣，我用盡所有辦法就是想欲揣著較俗、較好勢的厝。希望我會當租著我理想的厝！

    頂拜六我佮我的小妹去輔仁大學面試，然後去允言老師鼓勵阮去的人權博物館籌備處參訪。徛佇人權博物館籌備處內底，感覺我會使更加體會白色恐怖時代人民的驚惶佮不安。看著第一法庭內主判官的位置，敢若我就是準備欲予判刑的犯人。行出第一法庭，刻佇軍事法庭外面的「公正廉明」四字刺入我的目睭。彼四字是予我感覺真好笑，這佮白色恐怖時代的審判真正是反差足大。面會室內的電話錄音予我一種幻想，若像我就是咧佮當事人講話。

    因為進前我有去參訪過綠島的人權博物館，所以遮擺參訪人權博物館籌備處予我對白色恐怖時代有更加深的認知!

    頂禮拜放清明連假，嘛就是春假。清明節對阮兜來講是一个大日子，分散佇台灣各地的親族攏會轉來，大家做伙去培墓。這擺去培墓時，我發現一項代誌，就是原來阮兜的祖先是對中國一个叫做「山前」的所在來的。
    清明連假結束了後，就是台一甲的服務學習－－行大甲媽。對雲林縣的元長鄉開始行，目的是嘉義縣新港鄉的奉天宮。老師講這擺先予阮試水溫，等到二年仔的時陣，就愛來行全程。
    按呢行了歸工，我的跤實在是有夠痛嘛有夠酸!行一工就按呢，明年是欲按怎?這馬我只要想到明年愛行九工，就真正是欲哭無目屎啊!

    今仔日的地動真正足驚人。地動時我拄好佇司令臺邊仔，彼當時予我的感覺是天地攏歪一邊，實在真恐怖！行佇我邊仔的同學嘛攏驚一著，閣有人互相攬的。

    今仔日除了地動以外，閣有一項大代誌發生－－遐就是停水！對今仔下晡四點開始到明仔下晡四點，攏總二十四小時。住佇宿舍的大家攏提水桶準備欲儲水，按呢才袂無水通用。原本我以為今仔日會無水通予我洗身軀，結果毋但有水而且閣有燒水！好家哉有燒水，若無我就愛佇冷吱吱的暗時用冷吱吱的水洗身軀。

    明仔載暗時是全學校一年仔的合唱比賽，大家攏足骨力的練習，希望會使得到好的成績！

        今仔透早起床時，就聽到外口ê落雨聲。天頂烏雲一片，若是無看時鐘，會當做是暗時。準備欲去買早頓ê路途，我發現一件予我真歡喜ê代誌。我國文課所觀察ê樹仔開了足濟ê花，有白色ê、茄仔色ê，有夠古錐啦！

        頂禮拜五我總算會使轉去北港，這是對開學以來我頭一擺轉去。逐擺轉去厝內，攏會感覺也是蹛佇家己ê厝較好勢。

        遮禮拜因為學校ê比賽，所以平常時ê排球練習取消。因為按呢我加了足濟有閒ê時間，我打算利用遮的時間來提早完成老師交代ê作業，我嘛有計畫欲好好練習社團比賽ê樂曲。

      這禮拜應該是我對開學以來，上濟活動、上無閒ê一个禮拜。下早仔愛上學校ê課，下晡有排球ê比賽，禮拜佮有社團ê音樂比賽。雖然我只是在邊仔幫忙並無參加比賽，毋過我有學著足濟ê代誌。一邊共學長學姊鬥相共，一邊嘛會使增加家己ê經驗。

        不管是二胡也是排球攏是我上佮意ê物件，我會更加骨力練習，予家己ê實力更加厲害。有緊張刺激ê比賽、有歡喜快樂ê勝利、嘛有悲傷艱苦ê失敗。這禮拜我過了真充實，真正是足趣味！希望未來嘛會使遮爾趣味。